तीन अर्ब ६९ करोड पाँच लाख रुपैयाँ बराबरका सामाग्री निर्यात

झाँपा। नेपालको पूर्वीनाका काँकडभिट्टाबाट कात्तिकदेखि पुस मसान्तसम्म तीन अर्ब ६९ करोड पाँच लाख रुपैयाँ बराबरको कृषि, जडीबुटी तथा काष्ठ उत्पादन निर्यात भएको छ ।

तीन महिनामा २५ हजार ४० मेट्रिक टन मालसामान भारत, बांग्लादेशलगायत मुलुकमा निर्यात भएको प्लान्ट क्वारेनटिन कार्यालय काँकडभिट्टाले जनाएको छ ।

यस अवधिमा सबैभन्दा बढी एक अर्ब ६६ करोड आठ लाख रुपैयाँको दुई हजार ७६८ मेट्रिक टन चिया निर्यात भएको छ । अलैँची, अम्लिसो, प्लाइउड र अदुवासमेत उल्लेख्य मात्रामा निर्यात भएको छ ।

९८ करोड ९६ लाख रुपैयाँको एक हजार २३७ मेट्रिक टन अलैँची, ५३ करोड १२ लाख ६५ हजारको १५ हजार १७९ मेट्रिक टन प्लाइउड, ३० करोड ४६ लाख ४० हजारको दुई हजार ३८० मेट्रिक टन अदुवा र १३ करोड ८१ लाख २० हजारको एक हजार १५१ मेट्रिक टन अम्लिसो भारततर्फ निर्यात भएको छ ।

यसैगरी, तरकारीमा बन्दाकोभी र मूला भारत निर्यात हुने गरेको छ। मुसुरो दालसमेत उल्लेख्य मात्रामा निर्यात भएको छ ।

एक करोड ७२ लाख ६२ हजारको १२६ मेट्रिक टन मुसुरो दाल, २० लाख ४८ हजारको १२८ मेट्रिक टन बन्दाकोभी र २९ हजारको दुई मेट्रिक टन मूला भारत निर्यात भएको कार्यालयले जनाएको छ । जडीबुटीतर्फ चिराइतो, पीपला, अमला, मजिठो, सुगन्ध कोकिल, धूपी, पदमचाल र चुत्रो रहेको छ । यीमध्ये चिराइतो सबैभन्दा बढी मात्रा र मूल्यमा निर्यात हुने गरेको छ । यसअघि पहिलोमा पाँच अर्ब २७ करोड ३६ लाख रुपैयाँको नेपाली उत्पादन निर्यात भएको थियो ।

सम्बन्धित खवर

ताजा समाचार

लोकप्रिय